伊朗電影《There Is No Evil》片長 151 分鐘，開頭要畀啲耐性睇，一齊睇嘅朋友完場表示第一個故事佢睇到瞓著咗。係嘅，呢齣戲係由幾個「故事」組成，而第一個故事，喺完全唔知電影資料背景之下，我雖然好留心咁睇，睇睇下都覺得，搞乜呀？
--- 以下有劇情透露 ---
睇見個男人喺度接老婆、去銀行，個老婆好多嘢講，好多抱怨，去完銀行去接個女，同個女去超巿，之後一齊去探佢哋老母，個阿媽有病要佢哋照顧……
咁就睇住佢哋嘅日常成半個鐘 (冇計過)，真係都幾平淡……以為睇緊實況劇，但就因為咁，呢個平常家庭生活嘅舖排，令到鏡頭突然介紹呢個男人每日返工嘅工作，就特別深刻。
而呢個男人嘅工作，就係執行死刑。
咁都算劇透？在我嚟睇，基本上真係乜都唔知去睇至會多啲享受到齣戲嘅安排同反差。之後三段故事，就好唔同，係講主要人物因為唔想殺人而苦惱，做出好多事，有啲，可以避開咗，但一生就過住唔見得人嘅生活，有啲，以為只係執行職務，但點知知道殺嘅人其實只係異見人士…等等。
There Is No Evil，究竟執行死刑嘅人，係咪都係有罪？其實死刑都有好多地方有，好似好少會將執行死刑嘅人同「平庸之惡」嘅人放埋一齊，但我諗喺呢齣伊朗電影裏面嘅就比較特別，因為原來伊朗嘅人係強制要當兵，而當兵時如果被安排去做行刑嘅話係唔可以拒絕，如果唔係係會好大鑊。而且唔當完兵佢哋喺社會係唔會搵到嘢做、冇得攞車牌、冇得攞護照……等等，即係冇好日子過。
另一樣特別嘅，就係被判死刑嘅，唔一定係我哋普世價值認為應該罪該至死嘅，有啲，例如政治犯、異見者，我哋甚至唔覺得有罪。所以，點解戲中有角色會有良心嘅爭扎，而佢哋都仲要係信神嘅，普遍應該係會有唔應該殺人嘅意識。
導演 Mohammad Rasoulof 已經俾伊朗禁止佢拍戲，但唔知點解仲會拍得成又可以世界發行，不過重點係佢呢齣戲的確令人深思，當然針對伊朗嘅問題就引嚟政權唔妥，但除去伊朗嘅嘢，都係令人思考嘅電影。
人喺咩情況之下至應該殺人、奪去人性命？其實好難答，冇一個絕對嘅答案。近年有套台劇《我們與惡的距離》裏面嘅殺人犯，最後被處決。佢冷血咁殺咗一個無辜嘅人，但係咁樣，係咪就應該殺咗佢？而執行死刑嘅人，會有良心責備嘛？如果佢殺嘅唔係無辜嘅人，就會冇咁應該殺佢？如果執行死刑嘅人都有平庸之惡，咁我哋呢？呢個社會呢個制度嘅一分子呢？
應唔應該，只有自己嘅良心知。就算個世界個社會個制度話你咁樣做冇錯，但你嘅良心過唔到就係過唔到，同樣，第一個故事主角，佢日日都係咁，過佢嘅生活，好似冇事發生咁。觀眾可能會話佢已麻木，係平庸之惡。食食下嘢走去 push the button 就整死人。佢只係打份工。但佢咁樣係惡嘛？世上唔使直接去做但又間接令呢啲事發生嘅大眾，同惡嘅距離就會遠啲？我諗諗到頭都爆都諗唔通。
dieman
沒有留言:
發佈留言