A Private War (第一眼戰線)

《A Private War》講述記者 Marie Colvin 自到斯里蘭卡訪問遇到意外失去一隻眼，之後佢嘅人生有咗好大嘅轉變，到訪唔同嘅戰區，最後死於敘利亞。

雖然呢齣戲講咗呢十幾年嚟幾場好大嘅革命同戰爭，但係，A Private War 係 Marie Colvin 自己嘅戰爭，一路睇呢齣戲，一路感受佢自己打緊仗。

有時，睇戲嘅價值係令自己對一種事物有咗唔同嘅睇法，對自己咁啱當刻遇到嘅困擾，有咗一個指示。其實我一路都唔太了解好似主角呢種人，正如佢自己都講，其實佢係好矛盾。我亦一路對呢種所謂報導真相嘅記者有種偏見，就係佢哋嘅旁觀地高談闊論以及對當中單一故事嘅著迷，而主角嘅問題亦係因為佢對當中每人嘅故事都著迷咗，甚至有咗創傷。

我的確有咗唔同睇法，Marie 嘅內心痛苦，冇人明白，佢要生活喺咁矛盾嘅世界，而我哋每人其實都係，只係我哋只能/可以抽離。尤其係佢上司對佢講嘅一番話，對我都當頭棒喝，就係Marie呢種奇怪嘅人至會走去做呢種人人都唔想做嘅嘢，如果連佢都失去信念咁點算。嗰刻，我至醒起，信念嘅重要，對好多迷失嘅人包括自己，可能就係失去咗呢樣嘢，唔記得咗。

故事冇明確話Marie係咪有返信念，佢自己嘅仗打成點，但佢人生，連死之前，都真係做緊佢認為有意義嘅事情。演員 Rosamund Pike 扮 Marie 嘅腔調嚟演，之後播返 Marie 真人講嘢，又真係幾神似。

呢齣戰爭片，唔係講近代某幾場嘅戰爭，而係講主角心路自己打緊嘅扙，同時，我覺得，呢種 private war ，亦係存在喺世上人嘅心裏面，呢個時代，我哋只顧經濟發展，但同時不斷有人受苦嘅事實係冇人理會，我哋唔係唔知，只係太遠，但就算有人肯去近距離報導，我哋亦冇感覺，好似主角飲酒麻醉住，定係清醒地去活喺矛盾嘅現實，不斷爭扎緊，內心打緊仗。