2017/09/29

The Big Sick (情人眼裏巴基斯)

故事係講主角 Kumail 喺美國邊做 Uber 司機維生,邊做現場楝篤笑,認識咗 Emily,發展落去一路都幾順利,不過因 Kumail 家庭背景而分手,之後 Emily 仲突然染上搵唔到原因嘅病昏迷,Kumail 喺呢段時間照顧 Emily,仲要同 Emily 嘅父母相處。

個故事係根據 Kumail 本人真正經歷去改編,演 Kumail 嘅亦係佢自己。對於我嚟講,講一個 comedian 嘅故仔係幾新鮮,喺香港我哋淨係會識啲喺劇場租個場地楝篤笑嘅出名搞笑藝員,但係 comedian 喺外地係好平民化,同啲喺酒廊自彈自唱嘅一樣。

講真,啲笑話係英文,同埋我估都同當地文化有關,聽開香港嗰種笑話,就唔係太明白有乜好笑。不過呢齣戲講嘅係呢位 comedian 嘅一段經歷,比起佢嘅笑話更加有趣同豐富。裏面描寫咗一班 comedian 嘅生態,口不對心,唔敢講心裏面嗰句。

Kumail 比其他人更特別嘅係,佢父母係由巴基斯坦移民去美國嘅,而佢偏偏係鍾意做 comedian 呢啲講笑可以搵埋 911 嚟玩、唔會理會政治正唔正確嘅人嚟,佢本身好抗拒盲婚呢種所謂嘅「傳統」,甚至唔係咁信伊斯蘭,冇祈禱,仲係尋找緊信仰。同 Emily 一齊都唔會比佢家庭接受,因為佢一定要同巴基斯坦人結婚。可想而知佢呢種人點會頂得順個屋企。

但係呢齣戲唔似一啲政治正確嘅戲咁,怪責當地令呢個人「變」成咁,反而由 Kumail 把口反問番,一個世界上所有移民去第二度嘅人都應該坦白面對嘅問題,就係,點解要移民?既然咁唔鍾意當地嘅文化,又咁死守自己家鄉嘅習俗。就好似依家某地大多數移民去自由國度,但偏偏佢哋原來唔鍾意自由。

電影最好睇嘅,係 Kumail 同 Emily 父母嘅相處,Kumail 嘅笑話同處世態度,反而令自己多咗兩個朋友,每人都有自己一啲難解嘅問題,但係遇到合適嘅人同時機,可能就會有所改變,而呢一場 big sick,亦為大家製造咗一個意想不到嘅機會。

呢齣戲睇得我好舒暢,係見到戲中人真係盡力活喺佢哋想生活嘅地方,同志同道合嘅朋友,一齊去向目標進發,做自己想做嘅事,拋開枷鎖。最重要係主角表現出嚟嘅,唔係盲目正能量,而係有堅持,但又對遭遇從容嘅人生態度。

dieman

2017/09/27

2017-09-28 香港上映

- The Lego Ninjago Movie (LEGO旋風忍者大電影), I, 101 mins, 英文配音廣東話配音
  導演 : Charlie Bean, Paul Fisher, Bob Logan
  http://www.legoninjagomovie.com/

- American Assassin (美國特工), IIB, 112 mins, 英文
  導演 : Michael Cuesta
  演員 : Dylan O'Brien, Michael Keaton, Sanaa Lathan, Taylor Kitsch
  http://www.american-assassin.com/

- 追龍 (Chasing The Dragon), 128 mins
  導演 : 王晶、關智耀
  演員 : 甄子丹、劉德華、鄭則仕、姜皓文、劉浩龍

- Colossal (美女變怪獸), IIA, 109 mins, 英文
  導演 : Nacho Vigalondo
  演員 : Anne Hathaway, Jason Sudeikis, Dan Stevens
  http://sheiscolossal.com/

- 煙花,應該和誰看 (FIREWORKS, Should We See it from the Side or the Bottom?), IIA, 90 mins, 日文
  導演 : 新房昭之, 武內宣之
  http://www.uchiagehanabi.jp/index.html

- Good Time (命中有罪), IIB, 102 mins, 英文
  導演 : Josh and Benny Safdie
  演員 : Robert Pattinson, Benny Safdie, Jennifer Jason Leigh
  http://www.finefilms.co.jp/goodtime/

- The Big Sick (情人眼裡巴基斯), IIB, 120 mins, 英文
  導演 : Michael Showalter
  演員 : Kumail Nanjiani, Zoe Kazan, Holly Hunter
  http://www.thebigsickmovie.com/

- オケ老人! (Golden Orchestra / 黃金愛樂樂團), I, 120 mins, 日文
  導演 : 細川徹
  演員 : 杏, 黒島結菜, 坂口健太郎, 笹野高史
  http://oke-rojin.com

2017/09/25

A Taxi Driver (逆權司機)

改編自真實事件嘅韓國電影,講嘅係韓國 1980 年發生光州事件,漢城司機金先生幫助德國記者 Peter  進入光州拍攝當時發生嘅事,以及將佢送返機場,成功將事件向世界報導。

由於 1979 年總統遇刺,到軍人政變,1980 年戒嚴同禁止政治活動及對國家元首任何批評,引起各地嘅反抗獨裁統治,示威。而光州係被捕反對黨人物金大中嘅出身地,同埋係追求民主嘅地方,就算軍人暴力鎮壓,好多平民被殺,都繼續反抗。

呢齣戲講嘅係未反抗嘅時候,光州啱啱畀圍城,禁止同外界有接觸。而其實漢城都已經有好多大學生周圍示威抗議,只係唔知道光州咁大件事。做司機嘅主角金先生,到送 Peter 入光州嗰日,都唔知發生乜事,佢代表嘅係呢種世界上嘅大多數,唔係好理會身邊發生乜事,只係覺得阻佢生活就唔啱嘅人,啲人煩到嘔,大學生讀屎片。

Peter 呢類外媒,亦好代表咗某種知識份子有啲高高在上嘅心態,認為自己好重要,開頭其實有啲乞人憎,雖然金先生都係衰格嗰種粗人,但 Peter 係完全睇唔起呢種 taxi driver。呢齣戲叫 a taxi driver 都幾有意思,Peter 到咗最後,其實最掛念嘅係呢一位 taxi driver。

當然故事都好明顯係講佢兩個點樣改變自己嘅睇法,金先生眼見軍人向平民殘殺,同埋知道政權用傳媒嚟欺偏平民,而 Peter 就由之前嘅覺得記者要去埋啲亂嘅地方至啱,以一個旁觀者嘅冷眼去睇,變咗要見到自己新認識嘅人死去,唔忍心睇落去,對金先生呢個粗人直頭改觀。

電影整體係編排得好,好容易理解,好容易投入,只係後段有啲長氣,Peter 某啲同平民嘅對白我覺得有啲格格不入,甚至堆砌。不過其餘尤其金先生嗰部分係非常好嘅。

香港人當然又會諗起好多嘢,但係我第一樣諗嘅係點解南韓到依家都仲要拍呢齣戲呢?原來事件到依家都未有一個好好同令人滿意嘅裁決,原來好多當年有分行兇嘅人都冇受到制裁。呢樣令我諗起柬埔寨又係一樣,根本冇好好咁為死難者取回公道。

原來係咁,所以南韓仍然係爭取緊。而香港,當然我係諗起好多似嘅嘢,好似幫政權嘅媒體會將反抗一邊稱為暴民,而軍人呀警察嗰啲就好慘。不過,睇呢齣戲,令我諗嘅係另一啲嘢。

我見有啲熟口熟面嘅說話,好似話呢齣戲令人明白到政權係可以好冷血架咁。呢啲類似嘅嘢我以前都會感慨一番,好似睇返之前《無聲吶喊》同《逆權大狀》啲觀後感,真係覺得睇完會覺醒喇咁。但其實我睇完呢齣戲,唔再有呢種感覺。其實係唔會架喇。政權可以好冷血呢樣嘢,其實人地一早廿幾年前示範咗你睇啦,仲相信佢會改變,真係好有問題。

另一樣令我深思嘅係,光州事件呀,或者其他令人支持嘅運動,都係去到話政權殺害平民,咁樣,啲人至會同情,就會企喺示威者嗰邊咁話。呢樣嘢好似好合理,都好多人到依家都仲相信,如果唔係就唔會咁多和平理性非暴力嘅執著。

但係咁樣,好似光州事件呢齣戲個故事咁,如果啲軍人唔去鎮壓,咁點?個司機仲會唔會幫啲學生?佢究竟知唔知啲學生追求嘅係乜嘢?佢究竟認唔認同?連呢齣戲,都不斷強調,啲人係睇唔過眼殺平民架咋。佢哋其實唔係追求緊同一樣嘢。

呢齣戲只係講開頭光州啲人畀人殺,但之後其實點樣反擊,係冇點提,反擊喎,實情係點都唔使講,唔通仲係唱歌跳舞咩?有一幕個電視台畀人燒鬼咗,其實係反抗者做架。但齣戲唔講。點解呢?點解仲要將反抗者都有用暴力一面抺去?就係呢個世界太過沉醉喺聖人化上面。呢個世界太偽善。

呢個世界唔接受以暴力去對付暴力,連拉咗赤柬啲頭頭都要拖到安享晚年至審,受害人就死得就死,唔死嘅仲要同當日殺佢全家嘅人做街坊,有啲仲做緊官,搞到啲人心理有問題。而原來南韓都一樣。

啲爭取乜乜乜嘅人唔進化,但啲政權一早進化晒,佢只要唔去暴力鎮壓你,你就輸硬,因為旁人根本都唔係好想你要追求嘅嘢,當佢見你好慘畀人打殺,佢咪企喺你嗰邊。但啲政權進化咗囉,佢都唔理你就得,因為啲旁人遲早就覺你煩同搞事而憎你,乜都唔使出就收皮。

只係幾年間,睇《逆權大狀》同《逆權司機》,會有咁唔同嘅觀感。

dieman

2017/09/22

Kingsman: The Golden Circle (皇家特工:金圈子)

Kingsman: The Golden Circle (皇家特工:金圈子)

對上一集 Kingsman 係 2014 年年尾上映,約三年後嚟到第二集,可以話係強差我意,相對上一集嚟講實在係差咗好多,甚至獨立嚟睇,都唔係好好。

唔少人包括我自己,都會對同一導演同編劇有所期望,但所謂期望都幾冇根據,好可能係因為一齣戲爆紅,或惡評,就好似定咗一個導演嘅功力同風格。咁今次 The Golden Circle 就更加編劇導演都係上集嘅人,但個作品就差好遠。

故事都係有壞人出現 Kingsman 要對付,但今次都好大鑊係啲 Kingsman 特工死得七七八八。如果講乜嘢所謂突破嘅話,就係呢個故仔好捨得死好多嘅人,正如上集都可以死咗個重要角色。但睇個海報都知個重要角色又會出返嚟。

同埋另外加咗外地特工組織嘅合作,都係令到個效果差咗嘅,但係又其實,啲角色嘅死、同埋變咗英美合作,都係改編自同名小說,個故仔係小說度嚟,咁樣係咪又可以話唔關編導事呢?

-------------以下有劇情透露-------------

第一集當年一出時係令人驚喜,因為就算連 007 都要轉型,都及唔上 Kingsman 嘅皇家特工咁新鮮,嗰種保留紳士外形同禮儀得嚟又非常先進潮流嘅混合體,最緊要係加入咗年輕人做主要角色,英國係一路演進嘅地方,並唔老土。

電影表達方面喺當年就更加係出眾,裏面嘅打鬥場面,咁華麗,豐富同埋現實同特技配合得咁緊要,我相信當年都係因為呢樣嘢畀多咗好多分。不過當然喺劇情方面都好完整。但今集,一樣嘅特技,甚至覺得啲設計係差咗,而裏面嘅先進發明同潮流,同三年前係一樣,冇晒驚喜,仲要係個故仔劇情散亂,睇完就好失望。

小說改編嘅電影,唔知有幾多內容有權去改,但我就咁用睇故仔睇戲嘅心去睇,就覺得個故仔啲橋認真麻麻,好似 Tequila 個角色,作為佢之後會再出場好似好有嘢嘅角色,但呢集介紹嘅佢,係冇乜特別。Harry 點樣記得返啲嘢,又係好兒戲。去到最後套 Poppy 料嗰幕就最差,咁就得咗,完全冇設計過咁款。

另一樣嘢,我都明白好多人好憎美國現任總統,但呢齣戲嗰種明顯地話佢亂嚟同好 cheap 嘅手法,就更加核突同低裝,已經唔覺得好笑。

我認為今集電影講好多散同碎嘅嘢,但每樣都講得好簡單,好亂嚟。又要加個最後打鬥,我諗刪走嗰個角色,而花多啲心去搞好點樣用智慧去對付 Poppy 會好得多。依家變到係咁華麗打打打,而其實都已經唔係點華麗同睇到好悶好重覆。

比上一集,失色好多,就算獨立咁睇,都係麻麻地。

dieman

2017/09/21

Survival Family (求生走佬Family)

一日,突然所有用電嘅嘢都停止運作,住喺東京嘅鈴木一家四口,爸爸媽媽仔同女,踩住單車走去鹿兒島搵外公,因為農民生活自給自足,喺冇水冇電嘅情況下,都可以生存得到,但係路程太遠,呢一家人,本身關係亦唔好,途中就生出好多嘅事。

導演矢口史靖之前作品都係有啲瘋狂搞笑,但今次就轉咗,笑仍有,但笑係變咗一種會心微笑,淚中有笑,甚至睇到最後,係幾令人安慰嘅笑。

個名叫 Survival Family,呢齣戲真係係講家庭,並唔係好偉大嗰啲世界話題、大道理、人類生死存亡嗰啲嘢,我睇到嘅,感受到嘅,係佢對家庭呢樣價值嘅肯定。

電影嘅開頭,呢一家人,你會睇到個老豆真係唔死都冇用,佢喺家庭之中係個得把口嘅角色,得唔到人尊重,而喺社會中,公司裏面,亦只有工作呢樣依歸,停電開頭幾日,佢掛住嘅唔係屋企人之後點樣生活落去,而係做嘢,公司啲嘢點算好,話要為有番電之後作好準備咁樣。

係好似依家大部分打工仔嘅心態,但呢齣戲裏面嘅都幾好笑,停電都仲要返工,為咗返工,大廈大門冇電開唔到都要打爛佢,為嘅,就係要入去 office 度坐!其實又真係幾諷刺,呢個世界上,又的確係好多人所謂嘅返工,就係返去坐同傾偈,上級話唔使返工,分分鐘仲突然唔知點算好。

鈴木嘅仔同女,都係都市人一般,仔就用耳筒隔絕咗自己同身邊環境,女就好依賴現代通訊科技。係深津絵里演嘅阿媽最正常,佢係唯一一個 make sense 嘅人,第一件事就係諗有冇得食,或者阿媽呢個角色就有呢個作用,佢係維持一個屋企最必要運作嘅重要角色。雖然呢個阿媽係都市版,劏魚都唔敢。

表面上,呢家人繼續咁落去,可以衰到四散,阿媽同老豆嘅感情係點,由一幕睇星可以睇得出。但內心,佢哋都唔知道,其實佢哋唔想咁樣,平時嘅生活,唔係咁開心,但又冇話想作出乜嘢改變,阿女同同學或朋友嘅相處,其實唔係咁想,但身邊啲人就係咁,又可以點樣。就因為呢個機會,阿女收起佢嘅強顏歡笑,學都費事返,返屋企好過。

呢個機會,令佢哋改變咗。之後嘅其實都估到,冇用嘅老豆,唔妥屋企嘅仔女,唔想一齊咁辛苦踩去咁遠嘅地方,變咗一齊經歷,趁呢個難得嘅機會,一家人好想喺埋一齊,去佢哋嘅目的地,享受過程。

另外有樣嘢就係日本發生咁嘅事都可以冇乜罪惡發生係好奇怪嘅,本來係可以拍到好可怕,但導演揀咗冇咁樣做。我認為,呢個故事係講一個有裂痕嘅家,因經歷而復完,可以話係著重個人而唔係宏觀嘅嘢,呢個世界停電係點,對佢哋嚟講其實唔太著緊。而睇完係幾令我開心同舒服嘅。

dieman

2017-09-21 香港上映

- 劇場版 FREE! -TM- 絆 (Free! The Movie-TM - the Bond), I, 94 mins, 日文
  導演 : 河浪栄作
  http://tm.iwatobi-sc.com

- 與正念同行 (Walk with Me), I, 94 mins, 英文越南話法文
  導演 : Max Pugh, Marc J. Francis

- Kingsman: The Golden Circle (皇家特工:金圈子), IIB, 141 mins, 英文
  導演 : Matthew Vaughn
  演員 : Colin Firth, Julianne Moore, Taron Egerton
  http://www.foxmovies.com/movies/kingsman-the-golden-circle

- 逆權司機 (A Taxi Driver), IIB, 137 mins, 韓文
  導演 : 張勳
  演員 : 宋康昊、Thomas Kretschmann、柳海真、柳俊烈
  http://wellgousa.com/theatrical/a-taxi-driver

- Mrs. K, IIB, 92 mins, 廣東話
  導演 : 何宇恆
  演員 : 惠英紅、任達華、伍佰、蕭麗煊、劉永

- 我們的6E班 (Our Days In 6E), IIA, 90 mins, 廣東話
  導演 : 冼國林
  演員 : 孫耀威、葉芷如、阮頌揚、周嘉莉

- 紅衣小女孩2 (The Tag-Along 2), IIB, 107 mins, 普通話
  導演 : 程偉豪
  演員 : 楊丞琳、許瑋甯、高慧君、龍劭華、黃河

2017/09/13

2017-09-14,19 香港上映

2017-09-14

- Survival Family (求生走佬Family), I, 117 mins, 日文
  導演 : 矢口史靖
  演員 : 小日向文世、深津繪里、葵若菜
  http://survivalfamily.jp/

- The Beguiled (美麗有毒), IIB, 94 mins, 英文
  導演 : Sofia Coppola
  演員 : Colin Farrell, Nicole Kidman, Kirsten Dunst, Elle Fanning
  http://www.focusfeatures.com/thebeguiled

- Manifesto (反藝術宣言), IIA, 95 mins, 英文
  導演 : Julian Rosefeldt
  演員 : Cate Blanchett
  http://www.julianrosefeldtinberlin.de/

- 黑白迷宮 (Colour Of The Game), IIB, 104 mins, 廣東話
  導演 : 闞家偉
  演員 : 任達華、伍允龍、林雪、劉兆銘、李子雄、葉相明

- Baby Driver (寶貝神車手), IIB, 113 mins, 英文
  導演 : Edgar Wright
  演員 : Ansel Elgort, Kevin Spacey, Lily James, Eiza Gonzalez
  http://www.babydriver-movie.com/

- An Inconvenient Sequel: Truth To Power (絕望真相2), I, 98 mins, 英文
  導演 : Bonni Cohen, Jon Shenk
  演員 : Al Gore
  https://inconvenientsequel.tumblr.com/


2017-09-19

- I Am Michael (曾經是同志), IIA, 101 mins, 英文
  導演 : Justin Kelly
  演員 : James Franco, Zachary Quinto, Emma Roberts

2017/09/06

2017-09-07,09 香港上映

- American Made (巴利薛爾:飛常任務), IIB, 115 mins, 英文
  導演 : Doug Liman
  演員 : Tom Cruise
  http://www.americanmademovie.net/

- 愚行錄 (Gukoroku – Traces of Sin), IIB, 120 mins, 日文
  導演 : 石川慶
  演員 : 妻夫木聰、滿島光、小出惠介、松本若菜
  http://gukoroku.jp/

- IT (小丑回魂), IIB, 135 mins, 英文
  導演 : Andrés Muschietti
  演員 : Jaeden Lieberher, Bill Skarsgård
  http://www.itthemovie.com/

- Overdrive (非常速盜), IIA, 94 mins, 英文
  導演 : Antonio Negret
  演員 : Scott Eastwood, Freddie Thorp, Ana de Armas
  http://www.overdrivemovie.co.uk/home/

- 西謊極落:太爆‧太子‧太空艙 (The Sinking City Capsule Odyssey), IIB, 100 mins, 廣東話
  導演 : 吳漢邦、吳兆麟
  演員 : 周柏豪、連詩雅、林敏聰、張繼聰、鄭欣宜、蔡瀚億、林盛斌、雨僑

- The Zookeeper's Wife (烽火動物園), IIA, 126 mins, 英文
  導演 : Niki Caro
  演員 : Jessica Chastain, Daniel Brühl, Johan Heldenbergh
  http://www.thezookeeperswifefilm.com/

- 戰狼2 (Wolf Warrior II), IIB, 123 mins, 普通話
  導演 : 吳京
  演員 : 吳京

- 那個靜默的陽光午後 (The Silent Teacher), IIA, 74 mins, 國語
  導演 : 陳志漢