其實呢齣戲講點樣出貓都唔係話好勁，事實上佢個英文戲名係叫 Bad Genius，Lynn 同 Bank 就係 Genius，有頭腦，各人嘅選擇用喺邊度，會有唔同嘅人生，有人用能力去喺唔公平嘅世界度賺錢，有人有能力都唔肯咁樣做，好有骨氣咁，究竟乜嘢至係 Bad？係咪喺個唔公平嘅遊戲度用自己能力去偷步就係 Bad？當然呢齣戲冇打算講得咁深入，而大致嚟講個主旨都係去返誠實同對得住自己嗰啲道理。但其實所有嘢都係人嘅選擇。
我呢兩年睇好多好多泰國嘅青春劇同戲，佢哋好多時都有一個相似嘅背景，就係窮學生為咗前途，去有錢人至讀嘅中學讀，結果梗係一係要充大頭鬼，一係就畀人發現笑佢窮、畀人蝦。我諗從中都某程度反映咗現實，而出國亦係當地有錢人嘅出路。《出貓特攻隊》嘅背景就係咁，主角係高中生，故事發展係喜劇形式，但裏面講嘅一啲嘢畀正劇仲要正經。
Lynn 同 Bank 嘅感情友情等亦喺好少幾幕簡簡單單但有力就表達咗出嚟，例如 selfie 照，之後張相點。佢哋之後點樣亦係一個我自己覺得幾好嘅結尾。
泰國嘅演員好多，十幾歳嘅新力軍每年都出現，呢齣戲裏面啲角色好似一完成高中就成人世界咁好似好誇張，但起碼喺當地嘅演藝事業度就係咁，啲演員過多幾年都仲可以做下講大學生活嘅戲劇，再大啲就唔得。呢方面睇返香港仲要啲四五十嘅人嚟扮後生係好唔同。
另外泰國嘅演員係可以演到好多唔同嘅角色。連啲神態都可以好唔同，就以呢齣戲演 Lynn 嘅 Chutimon Chuengcharoensukying 為例，初初入學嘅平庸女同之後嘅成熟樣佢都做得到。演 Bank 嘅 Chanon Santinatornkul 同演有錢仔 Pak 嘅 Teeradon Supapunpinyo，喺幾年前泰戲 series《Hormones》第三季裏面分別做一個愛上 lesbian 嘅純情男同一個做出租男友搞出禍嘅 playboy，Chanon Santinatornkul 亦喺電影《Love is coming》兩集都有做一個衰衰格格 friend 嘅角色，但佢喺《出貓特攻隊》係演到完全第二個人咁。
呢個世界係唔公平，有錢人已經嬴咗，遊戲本身係咁，不過，呢齣戲始終好有教育意義，乜嘢至係嬴？睇你自己想過乜嘢生活同埋自己嘅道德去到邊。但呢個世界就係咁，香港演員四五十仲要扮細同埋成班老油條霸住晒，而泰國啲演員好有才華演藝水平係咁升，但香港好有錢，就係咁囉。
dieman
沒有留言:
發佈留言